TINAN FOUN 2015

HANOIN FOUN, ESPERANSA FOUN

Tinan 2014 liu dau-dauk ona, la sente loron no kalan iha tinan 2015 troka ba malu ona;

Buat barak iha tinan 2014 ita hakat liu hotu ona;

atu di'ak eh atu at, atu susesu eh atu faillansu;

atu tanis eh atu atu hamnasa, atu hadomi eh atu laran moras;

Buat hirak ne'e hotu oras ne'e sai de'it ona hanesan lembransa;

Nu'udar historia ida ne'ebe maka sei konta husi jerasaun ba jerasaun;

ou sei de'it ona hanesan memoria ba ema idak-idak.

Tinan 2015 la'o dau-dauk ona;

los duni katak, di'ak eh at, susesu eh faillansu;

tanis eh hamnasa, hadomi eh laran moras;

buat hirak ne'e sei akompanha nafatin ita nia moris;

maske nune'e, ita presiza hakerek fali historia moris nian ne'ebe di'ak liu.

Atu bele hakerek fali historia moris ne'ebe di'ak liu, ita presiza iha hanoin foun no esperansa foun.

Hanoin foun, sei lori ita atu hateke ba futuru;

Hanoin konaba sa ida maka ita bele halo;

Hanoin konaba sa ida maka ita bele hetan;

Hanoin konaba sa ida maka ita bele fo;

Hanoin konaba sa ida maka ita bele simu;

Hanoin hirak ne'e hotu, lori ita ba esperansa foun;

esperansa ne'ebe bele halo ita moris di'ak liu tan;

esperansa ne'ebe bele lori ita moris produtivu liu tan;

esperansa ne'ebe bele haraik mai ita moris dame no hakmatek;

esperansa ne'ebe bele dudu no dada ita atu fo domin no servi ba malu di'ak liu tan. by Ze.

Loron Ikus 2014

Ohin loron ne'e...hau mesak tur horik iha hau toba fatin;
hamaluk hau doben ne'ebe luta hasoru moras ne'ebe nia senti;
Ohin loron ne'e...loron ikus iha tinan 2014 nian;

Tinan ne'ebe naruk, no nakonu ho aitarak iha ami nia moris;
Tinan ne'ebe fo lisaun barak mai ami atu aprende;
No arepende ba buat hotu ne'ebe ami halo no la di'ak;

Ohin loron ne'e...loron ikus nian iha tinan 2014;
ami nunka lakon esperansa ba moris di'ak no ksolok neebe ami sei hetan;
ami sempre fiar...maske lian barak maka la fiar;
ami sempre iha esperansa....maske ema balun lakon esperansa. by Ze

LARAN TRISTE

Laran ne'e triste tebes bainhira la iha fiar husi o;
laran ne'e triste tebes bainhira rona o nia liafuan sira;
liafuan ne'ebe nakonu ho hirus no vingansa;
liafuan ne'ebe prejudikadu tebes.

 Fuan ne'e tanis bainhira rona lian ne'ebe semo mai hau tilun;
 Fuan ne'e halerik maka'as tebes bainhira lian hirak ne'e soke ha'u laran;
 Iha ka lisaun ruma ne'ebe ha'u hetan husi ne'e?

Tan sa maka lian hirak ne'e nunka lakon husi hau tilun?
Tan sa maka hanoin hirak ne'e sempre hatadan mai hau leten?

Laran ne'e triste, fuan ne'e tanis
Hau sente mesak duni
Hau sente la'ek duni

JUSTICA

Dala ruma ha'u hanoin, moris ne'e la iha justica;
ema balun bele moris ho hakmatek no kontenti maske buat ida la iha;
balun seluk moris ho deskonfiansa no nakonu ho vingansa.

Ema ne'ebe riku uza nia riku goza nia moris;
ema ne'ebe ki'ak hakruk ho triste halerik ba nia susar;
dala ruma, ema riku uza nia riku ho hasusar ema ki'ak;
bainhira nune'e ona, justica mos lakon let de'it.

Justica, lia fuan murak ne'ebe hanesan osan mean;
ho justica, ema moris iha balansu paz no dame nia laran;
liu husi justica, ema sei hakruk no respeitu ba malu;
nune'e justica, maka xave ba moris igualdade nian;
ema riku no ema ki'ak, feto no mane, ferik-katuas no jovens iha direitu ne'ebe hanesan;
justica maka dalan los liu hotu.

Liman Kona O

Ohin, loron ne'ebe nakonu ho hirus
hirus tamba buat la'ek
ne'ebe maka nia folin la'ek tebes duni.

Ohin, ha'u nia liman kona o
la os tamba ha'u la hadomi o
maibe tamba ha'u la hadomi ha'u nia an rasik.

ohin, o senti moras tebes duni
mata wen turu tun habokon o nia hasan
halo ha'u neon sala tebes.

ha'u hanoin tebes o iha kalan ne'e.
iha momentu o la iha ha'u sorin
ha'u senti mesak tebes duni.

MEHI

Bainhira kalan toba, ha'u mehi kona o;
ema ne'ebe iha loron hirak ikus ne'e hamaluk hau nia moris;
hau nia mehi furak tebes, mehi ne'ebe hametin esperansa moris;

iha hau nia mehi, iha esperansa moris;
moris ne'ebe maka ami hein liu husi sakrifisiu nia laran;
sakrifisiu atu hetan moris ne'ebe maka ami mehi.

Bainhira hau hakfodak, hau mehi de'it;
mehi ne'ebe hau mehi lakon le'et de'it;
lakon hamutuk ho maho ben ne'ebe habokon rai nakaras ne'e.

FORSA LAEK

Bainhira ha'u loke matan iha dadersan nakaras;
Bainhira ha'u ain hakat tun husi ha'u kama toba;
iha tempu ne'eba, ha'u senti ki'ik no fraku tebes;
ha'u la iha kbi'it, ha'u la iha forsa;
nune'e ha'u tuku tu'ur, hatada an iha ha'u kama leten.

Bainhira tilun ne'e nakloke hodi rona ema tatoli;
laran ne'e senti moras, basa lian tatoli kro'at tebes iha ha'u tilun;
neon ne'e tanis, maibe ha'u la iha forsa atu hakilar;
basa ha'u emar, senti ki'ik no fraku tebes.

Bainhira ha'u ibun nakloke atu tatolin;
maibe ha'u lian senti lakon iha anin nia huu;
emar barak haree, hamnasa ho cinico;
ha'u sentin neon kraik tebes, tuku tu'ur hatada an iha rai.

MESAK

Mesak

Kalan ne'e hau senti mesak los,
la'os tamba o la iha hau nia sorin,
la'os tamba o dok husi hau,
maibe, laran ne'e maka senti mesak los.

Kalan ne'e mesak senti malirin los,
la'os tamba o la haku'ak hau,
la'os tamba o la hamaluk hau,
maibe, laran ne'e maka senti malirin los.

tebes, kalan ne'e hau senti mesak los,
tebes, kalan ne'e hau senti malirin los,
mesak iha hau laran malirin,
malirin iha hau laran mesak.

MOTO

                                                                   Hamaluk Hau

Kalan ne'e hakat ona ba nia rohan,
hatudu sinal nakukun sei troka ho naroman,
lori hau matan hateke as ba lalehan,
hare fulan no fitun fahe nia roman ba mundo.

Matan ne'e komesa todan atu taka,
dada besik mehi furak hamaluk ho o,
hau doben ne'ebe dok iha ne'eba,
hamaluk hau iha o nia toba kalan.

                                    Dader rai nakaras manu kokorek,
                                    lori hau matan hare o furak,
                                    hateke ba liur hare rai moris,
                                    ita hamutuk sei haburas mundo.

                                    Hakbesik mai hau doben,
                                    lolo netik o liman mai,
                                    hamrik besik mai hamutuk ho hau,
                                    hamaluk hau iha moris tomak.

keta taridu, keta tauk
moris nia hakat sei dok tebes
loke o liman hakuak hau
ita hamutuk hakat ba oin.

ESPERANSA BA ROMAN

ESPERANSA BA NAROMAN

ESPERANSA....
Liafuan furak ne'ebe maka sempre fo kbi'it atu ha'u hakat
la'o tuir laloran moris ne'ebe dala barak sa'e no tu'un
hatada hau matan hateke los ba oin
hare ho esperansa naroman ne'ebe nabilan.

ESPERANSA.....
Liafuan midar ne'ebe sempre foti hau fiar
bainhira neon ne'e kra'ik hasoru moris nee
foti ha'u ain kontinua la'o ba oin
hakat ho firme hodi ultrapasa susar hotu.

ESPERANSA...
Halakon nakukun iha hau neon
hafanun ha'u espirito aten brani hodi hakat
tamba ha'u fiar...
bainhira ha'u firme roman nia nabilan sei mosu mai.

SUSAR...TRISTE

Laran ne'e susar....
hanesan moris susar ne'ebe ohin loron hau infrenta
hamaluk neon ne'ebe tanis iha hau nia mesak kalan ne'e.
 tebes.....
dala barak o hanoin hau la hanoin o

hanesan laloran tasi ne'ebe husik hela nia masin iha rai henek leten
dala barak hau la hanoin o la hanoin hau
hanesan fulan ne'ebe fo nia roman kalan ba mundo
tebes....
dala barak hau la hatene o la hatene hau
laran ne'e susar no neon ne'e tanis hodi hare o susar
dala barak o lahatene hau hatene o...
halolo liman hodi halakon netik hamrok ne'ebe hau senti

tebes....
o hanoin hau la hanoin o...
hau la hanoin o la hanoin hau....
hau lahatene o la hatene hau...
o lahatene hau hatene o....
tebes...
susar ne'e triste tebes.